“维乐，醒下啦。”
嗯……？咩声啊？
个身唔知点解自己喐咗起身。
我望向隔离——矇茶茶嘅画面慢慢变清晰——颖彤嘅手放喺我髆头度，唔知发生咩事咁睇住我。
“孙维乐，你係唔係唔舒服啊？”
嚟把声同头先嗰唔一样喎……
我顺住把声望过去——培训班嘅老师喺讲台度攞住笔记簿望紧我，唔單止係咁，其他人都好似因为我被点名而望嗮过来。
“嗯，冇事嘅。”
“如果真係唔舒服嘅话，都可以提前番去唞阵㗎。”
“嗯。”
老师冇再讲落去，重新认真咁讲住我都唔知讲到边嘅内容。
“喂，你点解今日成日都喺度瞓觉嘅？平时做笔记最积极係你嘅喎。”
颖彤用剩係得我哋两个先听得到嘅声来问我。
我而家都重係有啲昏坨坨，冧起身琴晚嘅事，个头反而开始痛咗起身。
“琴晚嗰啲水果塔整衰嗮，主要问题反而搵唔出……”
“哈啊？你捱夜整水果塔啊？嗰个唔係啱学法甜嗰阵做嘅咩？你冧住从最简单嘅入边搵问题啊？”
“搵唔到唔單止，个塔皮越整越烂。”
“都越整越烂啰，点解重唔停低？咁嘅学习方法本身就有问题。”
“可能啩……”
我凸然间有啲肉赤——明明係自己交嘅钱去学，而家反而瞓咗（一）觉乜都冇听到。
冧住快速咁将嗰塔皮贴喺模具度，结果太过集中眼力，只眼到而家重肿肿嘚咁。
唉，都係听课算了，唔係嘅话就跟唔上了。
今次好似要做嘅係……
“歌、歌剧院？！”
我家阵係真係醒嗮了。
“係啊，等整出来之后想吃幾多就幾多！”
“整得出就撞鬼了！”
“又係嘅。要做到每层材料嘅厚度都喺0.5cm，特别係乔孔达，要整出嚟有啲难。”
我可唔可以而家走佬啊……
之前啲问题都未解决，又来嗰更难嘅……
关键係每次学完一个法甜后重要考核……
“维乐，咪喺度发吽窦啦，整咗先讲。其他材料先唔准备，做住乔孔达先，唔係嘅话其他啲材料做好咗放一边，时间一长就冇用嘅了。”
我昏坨坨咁听完颖彤嘅话后就去准备材料，佢去准备架罉。
记得前边几次都係我整衰咗先搞到过唔到嘅，冧冧下，剩係得泡芙嗰次係啱啱合格。
嗰阵颖彤又係好似而家咁剩係叫我称好调味料同食材，之后叫我将泡芙放入烤箱，等于成个泡芙都畀佢整嗮，我乜都冇帮到手。
“维乐，今次你来试下，唔係好复杂嘅。”
“点……点整啊？头先乜都冇听到。”
“就知道係咁嘅啦~”
颖彤将自己嘅笔记簿畀我。
都係睇佢嘅笔记舒服啲。上面重有佢自己画嘅图同文字描述，好似漫画咁。
我按照上边嘅流程开始整，好快就整好咗面糊，然后倒入烤盘度。
“喂！停低！”
“啊！？”
颖彤凸然叫咗声嚇死我，结果只手一滑，装住面糊嘅玻璃碗跌入烤盘。
BOOM一声，嗰啲已经倒出来嘅面糊飞到我块面度。
全部人都被嚇到望嗮埋来，搞到我想走走唔甩。
“唔好意思啊……”
颖彤代替我同佢哋道歉，等到其他人都重新做番自己嘅嘢后，佢先至细细声咁同我讲：
“对唔住啊，嚇親咗你。但係，你点解唔放油纸就直接倒入去啊？”
望住整衰咗嘅面糊慢慢从碗度流入冇油纸嘅烤盘中，我先至反应过来。
“我都唔知……点解会咁。”
“睇来要重新整过先得。落课后你番屋企唞阵先，整法甜唔係一日两日搞得掂㗎。”
又係嘅……唔可以再畀颖彤整咁多衰嘢了，同佢一起整乔孔达先啦。
“面糊有啲一粒粒嘅嘢喎，係未冇过筛好啊？”
“嗯……厚得滯。我来试下。”
“好似冇乜杏仁嘅香味了喎。”
“嚟次又整得太薄，衰咗了！”
“咁搞落去唔掂喎……”
我同颖彤都攰到用手撑住张枱。
攰死了……嗰厚度成日都唔得，多又不得少又唔得，老师过来教咗我哋都唔得。
其他人又係咁，剩係得一两组嘅人整成咗，结果冚唪唥嘅人都行埋去睇，包括我同颖彤。
又真係整得好好睇啊……
冇颗粒感，厚度多咗1毫米完全可以忽略，成块乔孔达话係金色传说都唔係讲假。
边有咁麻烦，用精油未解决得到啰。
精油……
沈晓艺嗰句话凸然出现喺个脑度。
我插入裤袋，入边乜都冇，反而摸度咗手机。
係了，喺书包度。
我将手机攞出来，先发现沈晓艺琴晚发咗幾条消息过来。
（昨天21:16）係未起度整法甜啊？有冇用精油啊？
（昨天21:30）重乜啊？嫌弃我嘅魔法啊？我嘅魔法边度唔好啊 (｀3´)
（昨天22:22）咪整咁耐了，睇到消息就畀我嗰答复啦。
只嘢啊，攞到联系方式咁耐，第一次发就剩係发啲咁嘅嘢，重加埋个咋娇嘅表情。
成日就记得叫我用精油，好采见度咗消息嗻。
都係唔用了，唔係自己搞掂嘅有咩用。
我喺手机键盘度求其撳咗几下，回复佢后就收番手机。
（19:26）你个脑度除咗精油重记得咩嘢。
